OSKARA

DANZA CONTEMPORÁNEA

Oskara aúna dous universos coreográficos diferentes, dúas miradas diversas: baséase na cultura vasca tradicional como punto de partida para a creación; ao mesmo tempo, trátase dunha obra creada desde a perspectiva de artistas de vangarda contemporáneos. É unha especie de instalación que percorre diversos aspectos da cultura vasca e os seus mitos desde a súa orixe ata a época contemporánea, debuxando un percorrido plástico e emocional a través de símbolos e iconografías plenos de forza e de encanto. Encerra en si a experiencia humana da maneira máis absoluta. O código dramático ten por obxecto un espectáculo articulado mediante unha linguaxe dunha abstracción profunda, case violenta. Unicamente a orde das composicións confírelle un sentido sensorial.