O Pazo de Cultura acollerá do 4 ao 27 de marzo a VI edición do Festival Internacional do monólogo teatral Singular. O evento foi presentado esta mañá pola alcaldesa e presidenta do Padroado de Cultura, Marián Ferreiro, e o edil de Cultura, Guillermo Sánchez Fojo, e consta dun total de doce monólogos teatrais dirixidos tanto ao público adulto como ao infantil, así como de actividades pararelas destinadas ao sector teatral. En concreto, o día 10 de marzo terá lugar un encontro entre programadores nacionais e internacionais (membros de Redelae) e compañías de teatro galegas, así como a e mesa redonda: "Circulación Internacional de Espectáculos Teatrais" na que participarán Gustavo Zidan (Uruguai), Octavio Arbelaiz (Colombia) e Zaida Sánchez (Costa Rica) baixo a presentación e moderación de Xosé Paulo Rodríguez (Galicia).

Os monólogos programados son os seguintes: 

• Magüi Mira: Molly Bloom. Venres 4 de marzo ás 20:30 h. A actriz xa deu vida a este mítico personaxe da novela de James Joyce en 1980. Molly desvélanos a súa paixón pola vida, a súa relación co sexo; segura de sí mesma, goza da vida que vive e da vida que imaxina.
• Quico Cadaval: Complexo de Edipo. Sábado 5 de marzo ás 20:00 h. O relato mítico orixinal do inmortal Sófocles versionado polo actor ribeirán en setenta e un trepidantes minutos.
• Laura Sarasola: A nena que vivía nunha caixa de mistos. Domingo 6 de marzo ás 18:00 h. Espectáculo para o público infantil e familiar inspirado no conto A vendedora de mistos de Andersen. Unha proposta de teatro de actriz e monicreques que conta con música en directo.
• Lucía Trentini: Música para fiambrería. Un policial verde. Venres 11 de marzo ás 20:30 h. Tres historias entrelázanse para contar un crime nacido da desesperación e do desamor.
• Blanca Portillo: Silencio. Sábado 12 de marzo ás 20:00 h. Vestido cun traxe de etiqueta dentro do que non acaba de sentirse cómodo, o dramaturgo, ou seica unha actriz amiga a quen pediu que o represente nun solemne acto pronunciando un discurso titulado “Silencio”.
• Larraitz Urruzola: A viaxe de Rosalía. Domingo 13 de marzo ás 18:00 h. Un espectáculo de monicreques unipersonal sobre Rosalía de Castro dirixido ao público infantil e familiar.
• Empatía Teatro: Esas cousas marabillosas.  Venres 18 de marzo ás 20:30 h. Con moitos personaxes e moitas situacións que se desenvolven coa axuda e complicidade do público, constrúese esta peza tenra e emocionante sobre a depresión e ata onde chegamos pola xente a que amamos.
• Dayana Contreras: La ciudad de las damas. Sábado 19 de marzo ás 20:00 h. Monólogo sobre o tema dos tópicos cos que se relaciona a unha persoa emigrante e os que se relacionan co seu xénero ao longo do tempo.
• Xarope Zulú: Corochas. Domingo, 20 de marzo ás 18:00 h. Espectáculo de pequeño formato dirixido á primeira infancia (0-3 anos) que combina a narración oral, a manipulación de obxectos e a música.
• Déborah Vukusic: Guerra de identidade. Venres 25 de marzo ás 20:30 h. Unha muller, metade galega e metade croata, que danza entre guerra históricas e conflitos individuais, dá conta da batalla na procura de si mesma, loitando entre o dramático e o cómico, o testemuño e a imaxinación, entre a memoria persoal e colectiva.
• Isabel Risco: Bravas. Sábado 26 de marzo ás 20:00 horas. A actriz ofrécenos a súa particular visión da historia das mulleres galegas, unha historia sempre roubada, agochada e invisibilizada.
• Xarope Zulú: Bichocas. Domingo 27 de marzo ás 18:00 horas. Espectáculo adicado á primeira infancia (0-3 anos) onde os obxectos e a palabra fannos viaxar a través do mundo animal.
   

As entradas para os espectáculos poden adquirirse ata o 16 de febreiro na quenda de persoas aboadas e estarán a disposición do público xeral a partir do día 19 de febreiro na billeteira do Pazo da Cultura.