A alcaldesa e presidenta do Padroado da Cultura, Marián Ferreiro, deu a coñecer a programación do Pazo da Cultura para o último cuadrimestre do ano. Unha variedade de espectáculos teatrais, musicais de danza e maxia dirixidos a persoas de todas as idades e cuxas entradas, tal e como avanzou, se porán á venda para o público xeral a partir do sábado 9 de agosto na billeteira do Pazo, se ben tamén se poderán adquirir online desde esta mesma web. Xosé Antonio Touriñán e Carlos Blanco, Lola Herrera e Natalia Dicenta, Antonio Durán “Morris”, Xabier Díaz e Iolanda Muíños, entre outros, subiranse ao escenario do Pazo entre os meses de setembro e decembro deste ano.

A comedia "Noite de retranca", protagonizado por Oswaldo Digón, Federico Pérez e Quico Cadaval, inaugura o programa o 13 de setembro. O día 21 a artista naronesa María López presentará o seu disco "Daydreaming". Xosé Antonio Touriñán e Carlos Blanco volverán ao Pazo con "Somos criminais e punto final" o día 27.

O mes de outubro comezará coa representación de "Un deus salvaxe", con María Ordóñez e Dani Trillo (días 3 e 4). O día 11 chegará "Me llamo Suleimán", protagonizado por Marta Viera. "El camino a La Meca" con Lola Herrera e Natalia Dicenta será representado os días 17 e 18. O mes rematará cun concerto de música pop e indie a cargo de Alondra Bentley, que presentará "La materia" (día 24), e coa comedia "Apaga o candil", de Cándido Pazó (día 25)

Novembro dará comezo cunha importante peza de teatro contemporáneo que está acadando un enorme éxito de crítica e público en teatros de todo o Estado: "1936" (día 7 e 8). A música rock chegará da man dun concerto de tributo a Queen, "Queen is back" (día 14). Seguirá a comedia "Non pasarán", escrita por Vanesa Sotelo e Tito Asorey (día 15). O día 20 será o momento para a danza clásica con "El lago de los cisnes". A obra de teatro contemporáneo "A metamorfose" con Fernando Dacosta e Sabela Gago, será representada o día 22. O mes pechará co concerto de música folk pop de Club del río (día 28) e a comedia "Mofa e Befa: os dous de sempre" (día 29), protagonizada por Evaristo Calvo e Víctor Mosqueira.

Iniciaremos decembro doa estrea de "Manual de patronaxe" con Iolanda Muíños, Susana Sampedro e María Roja (días 5 e 6). Un ano máis, este mes traeranos a Xabier Díaz (día 13). Decembro tamén é gospel no Pazo da Cultura, este ano con The South Carolina Gospel Chorale (día 18). O musical infantil "Ohana" (día 20) antecederá ao tradicional concerto de Fin de ano a cargo da Asociación Cultural Musical Sementeira (día 27). O punto final da programación chegará o día 29 co festival internacional de ilusionismo "Galicia Magic Fest".