Mañá martes, 17 de maio, celebraremos o Día das Letras Galegas, dedicado este ano á figura de Florencio Delgado Gurriarán, cun amplo programa pensado para todos os públicos, se ben centrado sobre todo nos máis peques da casa. Terá lugar ao longo de toda a xornada na praza da Lectura, situada nas Vivendas da Mariña (Santa Icía). As actividades serán todas de balde e, en previsión de mal tempo, desenvolveranse baixo carpa:

• 12:00 h: Silvia Penida, Diferentes diferenzas, a cargo de Silvia Penide. Espectáculo de contos e canción baseado no primeiro libro desta autora, todo un canto á diversidade, no que se transmite a importancia de valorar, respetar e admirar ás persoas, animais, cousas… e ofrece tamén a posibilidade de que as nenas e nenos aprendan palabras básicas en lingua de signos.
• 12.45 h: Xarope Tulú, Rilla, Rilla. Un espectáculo creado para aprender galego moi dinámico e interactivo.
• 16.00 h: Obradoiro das Efémeras, de pintura sobre cartón reciclado.
• 17.00 h: Jara Ortiz, Lúa triangular. Unha rapaza chamada Marta e unha píntega, de nome Oli, viaxan xuntas ao Mundo dos Contos, onde viven varias aventuras e transformarán o mundo nun lugar cheo de diversidade e xustiza.
• 17.45 h: Aldaolado, A ovella Engracia. Narración oral e música para contar a historia dunha ovella a que lle gustaríal saber onde vai a lúa cando sae de noite e por iso decide andar tras dela iniciando así unha viaxe única.
• 18:45 h: Concerto de As Efémeras.

Ademais destes actos programados, na zona haberá  un espazo de lectura con publicacións en galego de autores e autoras homenaxeados no Día das Letras Galegas.