O Concello de Narón e o Cine Club Serie B organizan o "Ciclo de cine galego" que se desenvolverá ao longo deste mes e outubro no Pazo da Cultura. A alcaldesa e presidenta do Padroado da Cultura, Marián Ferreiro, e o concelleiro de Cultura, Guillermo Sánchez Fojo, presentaron hoxe a programación acompañados polos integrantes do citado Club Alberto Pena, presidente, Anabel Varela, secretaria, Aitor Hermida, tesoureiro, e María Vales, vogal.

Trátase dunha proposta con entrada de balde, ata completar a capacidade do Pazo, podendo retirarse as entradas no despacho de billetes do Pazo da Cultura.

As propostas que poderemos ver son as seguintes:

• 23 de setembro: Sempre Xonxa (1989). Dirixida por Chano Piñeiro, foi a primeira película galega rodada en 35 milímetros.
• 30 de setembro: A illa das mentiras (2020). Dirixida por Paula Cons, conta con cinco premios Mestre Mateo, incluído o de Mellor dirección
• 7 de outubro: Dhogs (2017). Dirixida por Andrés Goteira, trátase da película máis premiada dos premios Mestre Mateo, con trece galardóns.
• 14 de outubro: Eroski Paraíso (2019). Dirixida por Jorge Coira e Xesús Ron, foi premiada nos Mestre Mateo nas categorías de mellor protagonista feminino e masculino.