Desde hoxe luns e ata o mércores 29 de xuño permanecerá aberto o prazo de inscrición para os Campamentos de Verán para os que ofertamos un total de 150 prazas dirixidas a menores de 3 a 12 anos. As inscricións deben realizarse nas oficinas do Pazo da Cultura de luns a venres, en horario de 9:30 a 13:30 h e o custo da matrícula é de 31,60 €. As actividades desenvolveranse en quendas quicenais (unha novidade respecto a edicións anteriores), do 4 de xullo ao 12 de agosto en horario de 9:00 a 14:00 h con servizo de madrugadores de 8:00 a 9:00 h. As quendas son as seguintes:

• Do 4 ao 15 de xullo.
• Do 18 ao 29 de xullo.
• Do 1 ao 12 de agosto.

En canto aos grupos de idade, serán tres:

• De 3 a 5 anos.
• De 6 a 9 anos.
• De 10 a 12 anos.

A práctica totalidade das actividades terán lugar no Pazo da Cultura, salvo as excursións que se realizarán a diferentes puntos da comarca: xogos tradicionais, propostas didácticas, sesións de baile tradicional e moderno, manualidades, actividades con instrumentos musicais, proxeccións de cine… son algunhas das iniciativas que se levarán a cabo nestes campamentos que teñen como finalidade axudar na conciliación da vida laboral e familiar ao tempo que ofrecen unha alternativa de ocio educativo ás nenas e nenos de Narón.