O próximo luns, día 12 de xuño, abriremos o prazo de inscrición para os "Campamentos culturais no Pazo", tal e como informou a concelleira de Cultura, Olga Ameneiro. Haberá un total de 225 prazas distribuídas en tres quendas:

• Do 3 ao 14 de xullo
• Do 17 ao 28 de xullo
• Do 31 de xullo ao 11 de agosto

Haberá tamén tres grupos de idade, tendo en todos eles preferencia as nenas e nenos empadroados en Narón:

• De 3 a 5 anos
• De 6 a 9 anos
• De 10 a 12 anos

As inscricións poderán formalizarse no Pazo ata o venres 16 de xuño, en  horario de 9:00 a 13:00 h, e terán un custo de 50 euros por quincena.

Os campamentos desenvolveranse en horario de mañá, de 9.00 a 14.00 h, nas instalacións do Pazo da Cultura, se ben se poderá realizar a entrada a partir das 8.00 h. Durante as diferentes quendas levaranse a cabo actividades como xogos tradicionais, manualidades, baile (tradicional, de salón, moderno, caribeños…), haberá proxeccións de cine, xogos en equipo, actividades de relaxación, vencelladas ao coñecemento dos instrumentos tradicionais, xincanas, etc.