A "Colonia de verán" do Padroado da Cultura é unha proposta lúdica e formativa que pretende facilitar a conciliación da vida laboral e persoal. Está dirixida a nenas e nenos de 3 a 12 anos empadroados/as ou escolarizados/as en Narón cuxos dous membros parentais (ou un en caso de familias monoparentais) traballen. As actividades estarán adaptadas ás idades de cada grupo e irán encamiñadas a fomentar nos menores valores como a tolerancia, o respecto, a diversidade, o coidado do medio ambiente ou a cooperación, entre outros.

O prazo de inscrición (de balde) permanecerá aberto ata o 31 de maio. A actividade desenvolverase no CEIP da Gándara do 27 de xuño ao 2 de setembro en horario de 9:00 a 14:00 h, ofrecendo servizo de madrugadores a partir das 8:00 h e de acompañamento ata a recollida ata as 15:00 h. Haberá un total de cinco quendas:

• Do 27 de xuño ao 8 de xullo.
• Do 11 ao 22 de xullo.
• Do 26 de xullo ao 5 de agosto.
• Do 8 ao 19 de agosto.
• Do 22 de agosto ao 2 de setembro.

A proposta foi presentada pola alcaldesa e presidenta do Padroado, Marián Ferreiro, e a concelleira de Igualdade, Mar Gómez.

Tes toda a documentación á túa disposición na Sede Electrónica: https://bit.ly/ColoniaVeránNarón2022. Así mesmo, podes consultar calquera dúbida no teléfono 981377700, ext 1108, 1109 e 1115.