SAÚDO DO ALCALDE

O esforzo do Concello de Narón por facilitar a veciños e veciñas o acceso, nas mellores condicións posibles, á cultura levou a esta institución, xa nos primeiros anos da etapa democrática, á creación do Padroado da Cultura, un organismo autónomo do Concello que conta coa participación na súa xestión de veciños e veciñas, representantes de entidades culturais e sociais. O labor do Padroado é de estudo, investigación e, finalmente, de divulgación cultural; en definitiva, de fomento da creatividade e de difusión da creación en materias diversas: a música, a danza, o teatro, a pintura e ou o audiovisual. A defensa e promoción da cultura galega, neste momento en perigo, é outro dos obxectivos do Padroado. As instalacións culturais do Concello de Narón son lugar habitual de encontro das moitas persoas que cada día traballan, desde as súas distintas responsabilidades, para facer posible non só a educación artística de mozos e mozas, nenos e adultos, senón tamén a convivencia diaria, a formación nos valores do esforzo e na constancia, e a práctica na toma de decisións, cuestións todas que forman parte da vida diaria de cada un de nós. Narón contribúe con este esforzo á construción dunha Galicia que respecta o seu pasado pero defende o seu futuro. José Manuel Blanco Suárez Alcalde de Narón